سمایل شه‌ره‌فی
لە رۆژانی حەوتووی رابردووداو لە دوو هەواڵی جیاوازدا وەزارەتی ئیتڵاعاتی كۆماری ئیسلامی ئێران رایگەیاند كە هێزەكانی سەر بەم دەزگا ئەمنییەتی¬یە لە شارەكانی تاران و پیرانشار چەند كەسێكی چەكداری سەر حیزبی دێموكرات و كۆمەڵەیان قۆڵبەست كردوە. وەزارەتی ئیتلاعاتی رێژیم لەم راگەیاندراوانەیدا ئامانج و مەبەستەكانی ئەم چەند كەسەی بە كاری تێرۆریستی و تێكدەرانە ناو هێنا.
لە پێوەندی لەگەڵ راستی و دروستی ئیدیعای گیرانی ئەم چەند كەسە لەلایەن وەزارەتی ئیتلاعاتی رێژیمەوە، دەتوانین ئاماژە بە وەدرۆخستنەوەی ئەم هەواڵانە لەلایەن حیزبی دێموكراتی كوردستان و كۆمەڵە بكەین كە هەر كام لە هەڵوێستی جیاوازدا ئەم ئیدیعایەی وەزارەتی ناوبراویان وەدرۆخستەوە. بەڵام ئەوەی لێرەدا جێی سەرنج و هەڵوێستە لەسەركردنە ئامانج و مەبەستی وەزارەتی ئیتلاعاتی كۆماری ئیسلامی¬یە لە بڵاوكردنەوەی وەها ئیدیعایەك دا.
رێژیم هەمیشە هەوڵی داوەو تا ئێستاش لەسەر ئەم سیاسەتەی بەردەوامە كە روخساری بزووتنەوەی مافخوازانەی خەڵكی كوردستان خەوشدار بكات و تەنیا لە چوارچێوەی ئەمنیەتی دا بیبینێ و پێناسەی بكات و پێڕەوی كردنی ئەم سیاسەتەش لەلایەن كۆماری ئیسلامی و بە تایبەت دام و دەزگا ئەمنییەتیەكانیەوە بۆ خەڵكی كوردستان و بە تایبەت رۆڵە چالاك و تێكۆشەرەكانی دیاردەیەكی نامۆ نیە. بەڵام پڕو پاگەندەكانی چەند رۆژ لەمەو پێشی وەزارەتی ئیتلاعات و، راست ناوهێنانی دوو هێزی سەرەكی و دیاری رۆژهەڵاتی كوردستان، ئەویش بە تێرۆریست كە گوایا چەند كەسێكیان بۆ كاری تێكدەرانەوەو تێرۆریستی ناردۆتەوە نێوخۆی ئێران و رۆژهەڵاتی كوردستان، بە پێی مەوقعیەتی ئێستای ئێران و كوردستان دەكرێ خوێندنەوەیەكی دیكەی بۆ بكرێ.
خوێندنەوەی واقعبینانەی هێزەكانی رۆژهەڵاتی كوردستان و بە تایبەت حیزبی دێموكراتی كوردستان لە پێوەندی لەگەڵ چۆنیەتی روانینی خەڵكی كوردستان و هێزو كەسایەتییە سیاسییەكانی بۆ بزووتنەوەی ناڕەزایەتی ئەم چەند مانگەی سەرانسەری ئێران لەلایەك و باسكردن لە جۆراوجۆرییەكانی پێكهاتەی سیاسی ئێران لەلایەن هێندێك لە كەساییەتییە دیارەكانی ئێرانی و پەرەگرتنی گوتاری فیدرالیزم لە فەزای مەجازیی سیاسیی ئێران لەلایەكی دیكەوە، زیاتر لە هەمیشە ترسی خستۆتە دڵی دەسەڵاتدارانی رێژیمەوە.
ئەزموونی سی ساڵەی خەباتی خەڵكی كوردستان و هێزە سیاسییەكانی دژ بە دەسەڵاتی سەرەڕۆی كۆماری ئیسلامی و ئەگەری رۆژ لەگەڵ رۆژ زیاتر نزیك بوونەوەی ئەم بزوتنەوەیە لە بزووتنەوەی سەرانسەریی ئێران كە ئێستا هەم بەدەنەو هەم رێبەرییەكەی لە ناوخۆی وڵاتە، لە راستی دا ترسێكە كە بە تایبەت لەماوەی چەند مانگی رابردوودا رێژیمی كۆماری ئیسلامی نەیتوانیوە لێی غافڵ بێت. چاوخشاندنێك بە سەر بارودۆخی مافی مرۆڤـ لە كوردستان و رادەی گیران و فشارخستنە سەر چالاكانی سیاسی و مەدەنیی كوردو هەروەها زیاتر میلیتاریزە كردنی ناوچە سنووریەكانی كوردستان لەماوەی چەند مانگی رابردوودا، هەر هەموویان بەڵگەن بۆ سەلماندنی ئەم ئیدیعایە.
بڵاوكردنەوەی هەواڵی بە درۆی قۆڵبەست كردنی چەند ئەندامێكی حیزبە كوردستانییەكان كە گوایا لە بەرنامەیان دا بووە كاری تێكدەرانەوەو تێرۆریستی بەڕێوە بەرن، لەلایەن وەزارەتی ئیتلاعاتی رێژیمەوە، تەنیا خەوشدار كردن و ناشیرین نیشاندانی رووخساری بزووتنەوەی خەڵكی كوردستانە. وەزارەتی ئیتلاعاتی رێژیم دەیەوێ لەم رێگاوە بە بیروڕای خەڵكی ئێران بڵێ كە ئەوانەی دیفاع و پشتیوانی لەبزوتنەوەی گۆڕانخوازانەی ئەمڕۆی ئێران و بە قەولی خۆیان "ئاژاوەگێڕان و فیتنەگێڕان" دەكەن، ئەوەتا هەوڵی كاری تێكدەرانە و تێرۆریستی دەدەن!! كە بێگومان جیا لە بەهانە دیتنەوە بۆ سەركوتی هەرچی زیاتری ناڕازییان، دەیانەوێ بە رەچاوكردنی ئەم پیلانە و ناحەز نیشان دانی بزووتنەوەی حەقخوازانەی خەڵكی كوردستان، درزو كەلێن بخەنە نێو بزووتنەوەی گۆڕانخوازانەی سەرانسەریی ئێرانەوە.
لێرەدایە كە پێویستیی هەرچی زیاتر لێك نزیك بوونەوەی هێزە نەتەوەیی و ئێرانیەكان هەست پێدەكرێ و ئەركیان لە پێوەندی لەگەڵ وشیار كردنەوەی هەرچی زیاتری كۆمەڵگا دەكەوێتە سەرشان بۆ ئەوەی رێژیمی كۆماری ئیسلامی كە زیاتر لەهەموو شتێك لە پرش و بڵاوی هێزە دێموكرات و پێشكەوتنخوازەكان بە قازانجی مانەوەی خۆی كەڵكی وەرگرتوە، نەتوانێ تەفرەقەو چەند بەرەكی لەنێو نەتەوەو هێزە گۆڕانخوازەكان دا بنێتەوە.